Sumqayıt şəhərində maşın təmiri sexində dava olub.
Demokrat.az-ın əldə etdiyi məlumata görə, 76-cı məhəllə ərazisində 1986-cı il təvəllüdlü Ravil Teymuru döyərək ona müxtəlif dərəcəli bədən xəsarətləri yetirib.
Hadisəni törədən Ravilin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Ravil ona elan olunmuş ittiham üzrə özünü təqsirli bilib. O, ifadəsində göstərib ki, 3 il bundan öncə rəsmi şəkildə özünə məxsus həyətyani sahəsinin 46 kvadrat metr hissəsini Teymura satıb:
"Teymur ölçü işlərinin düzgün aparılmadığını deyərək ödəyəcəyi puldan 5000 manatını özündə saxladı, ölçü işləri tam başa çataraq sənədini aldıqdan sonra verəcəyini dedi. Lakin buna baxmayaraq, mən Əmlak Komitəsindən mütəxəssis gətirərək ölçü işlərini aparmasını təklif etdim. Teymur isə mənimlə razılaşmır və bunu bəhanə gətirərək pulumu vermir. Hər dəfəsində ondan yerdə qalan borcumu verməsini tələb etdikdə, Teymur müxtəlif bəhanələr gətirir".
Təqsirləndirilən şəxsin ifadəsinə görə, hadisə günü saat 12:40-da Teymura zəng edib və ehtiyacı olduğundan pulu verməsini tələb edib:
"Teymur yenə də razılaşmadı, problemləri həll etdikdə pulumu verəcəyini deyərək ünvanıma nalayiq ifadələr işlətdi. Mən isə ona söyüş söyməməsini dedim. Teymur sözümə əhəmiyyət vermədi və işlədiyi sexə çağıraraq "kişi deyilsən, gəl üzbəüz söhbət edək" dedi. Həmin gün saat 15:30-da Teymurun sexinə getdim. Teymur həmin vaxt maşın təmir edirdi. Teymur məni görən kimi üstümə gəldi, yaxamdan tutaraq nə istədiyimi dedi. Sonra ünvanıma nalayiq ifadələr işlətdi. Mən də əsəbiləşərək əlimlə onun üz nahiyəsindən vurdum. Orada olan sonradan adının Sərdar olduğunu bildiyim şəxs araya girərək məni ayırdıqdan sonra özümə məxsus maşına əyləşərək getdim".
Bu cinayət işinə Sumqayıt Şəhər Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Zərərçəkən ona qarşı şikayətini geri götürüb.
Məhkəmənin hökmü ilə Cinayət Məcəlləsinin 73.2-ci maddəsinə əsasən təqsirləndirilən şəxsin barəsində olan cinayət işinə xitam verilib. O, cinayət məsuliyyətindən azad edilib.
