Mehdi Hüseynzadə adına Sumqayıt şəhər stadionunda elektrik enerjisinin kəsilməsi səbəbindən uşaqlar məşqlərə qatıla bilmirlər.
Bu barədə Sumqayit24.az-a valideynlər məlumat veriblər.
Onların sözlərinə görə, stadionun elektrik borcuna görə enerji təchizatı dayandırılıb. Nəticədə stadionda fəaliyyət göstərən cüdo və boks təlim mərkəzləri, eləcə də Abşeron-Xızı Regional Gənclər və İdman İdarəsi işlərini müvəqqəti olaraq dayandırıblar.
"Bu gün "WhatsApp" qrupunda məşqçi yazdı ki, məşqlər ləğv olunub. Uşaqlar yenə məşqsiz qaldı. Bir neçə gündür ki, vəziyyət belə davam edir", - deyə valideynlərdən biri bildirib.
Vətəndaşlar aidiyyəti qurumlardan problemin qısa zamanda həll olunmasını və uşaqların məşqlərinin bərpa edilməsini tələb edirlər.
Qeyd edək ki, məsələ ilə bağlı aidiyyəti quruma sorğu ünvanlanıb.
