Sumqayıtda tanışlar arasında qarşıdurma olub. Sumqayıt24 bu haqda 2 may tarixində Demokrat.az-a istinadən xəbər verir.
Hadisə “Göyərçin” parkı ərazisində yerləşən "Star Rooms'' restoranının yaxınlığında baş verib. 50 yaşlı Azər münaqişə zamanı tanışı Ruhidi döyərək ona müxtəlif dərəcəli bədən xəsarəti yetirib.
İstintaq orqanı tərəfindən Azərin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib.
İfadə verən kişi özünü təqsirli bilib. O bildirib ki, Ruhidlə təxminən 10 il əvvəl tanış olub:
“Özüm həmin vaxt avtobus sürmüşəm, Ruhid də mənimlə birlikdə işinə gedib-gəlib. Həmin vaxtdan da onunla münasibətimiz yarandı. Hadisə günü, saat 23.00-da Göyərçin parkı ərazisində gəzdiyim zaman "Star Rooms" restoranının yaxınlığında Ruhidi gördüm. Onunla söhbət etməyə başladım. Söhbət zamanı da Ruhidlə tanış olduğum müddətdə aldığı qaz sobasına görə borclu qalmış olduğu 20 manatı tələb etdim. O isə hazırda maddi imkanının olmadığını, imkanı olduğu zaman borcunu ödəyəcəyini dedi. Lakin bir neçə ildir ki, onu görmədiyimi, buna görə də pulumu indi istədiyimi bildirdim. Buna görə də Ruhid əsəbiləşdi, yenə imkanının olmadığını bildirərək ünvanıma nalayiq ifadə işlətdi. Bundan sonra onun sol gözünə yumruq vurdum. Ruhid də barəmdə polisə müraciət edəcəyini dedi”.
Sumqayıt şəhər Məhkəməsi təqsirləndirilən şəxsin zərərçəkmişlə barışdığını, zərərçəkmiş şəxsin ondan şikayətçi olmadığını nəzərə alıb. Bu səbəbdən Azərin barəsində olan cinayət təqibinə xitam verilib.
O, cinayət məsuliyyətindən azad edilib.
