Sumqayıtda məcburi köçkünlərin yaşadığı qəzalı binadakı vəziyyət nəzarətə götürüldü.
Qeyd edək ki, Sumqayıt şəhərinin Səməd Vurğun küçəsində, “Metallurq sanatoriyası” adlanan ərazidə yerləşən məcburi köçkünlərin məskunlaşdığı binada acınacaqlı vəziyyət hökm sürür. Sakinlərin sözlərinə görə, bina tamamilə qəzalı vəziyyətdədir.
Bina sakinləri Xeberle.com-a müraciət edərək bildiriblər ki, zirzəmini uzun müddətdir su basıb. Bu, həm pis qoxuya, həm də ağcaqanadların artmasına səbəb olub və nəticədə orada yaşamaq olduqca çətinləşib. Elektrik sistemləri də demək olar ki, sıradan çıxıb — şit tez-tez partlayır, sakinlər saatlarla işıqsız qalır. Bundan başqa, su problemi də olduqca ciddidir.
Sakinlər aidiyyəti qurumlardan xahiş ediblər ki, bu problemlərə dərhal reaksiya verilsin və tədbir görülsün. Onlar illərdir bu şəraitdə yaşamağın artıq dözülməz olduğunu bildirirlər.
Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən Xeberle.com-a bildirilib ki, Sumqayıt şəhəri, Səməd Vurğun küçəsi, 26-cı məhəllə, “Metallurq sanatoriyası” adlanan ərazidəki vəziyyət barədə qurum məlumatlıdır. Qeyd olunub ki, məcburi köçkünlərin yaşadığı binadakı mövcud vəziyyət Dövlət Komitəsi tərəfindən diqqətlə izlənilir və nəzarətdə saxlanılır.
Dövlət Komitəsi yaranmış vəziyyətlə bağlı artıq aidiyyəti dövlət qurumları ilə əlaqə saxlayıb və problemin həlli məqsədilə danışıqlara başlayıb. Hazırda məsələ ilə bağlı zəruri araşdırmalar aparılır.
