Sumqayıt Dövlət Universitetində magistrantların XXIII Respublika elmi konfransı onlayn formatda öz işinə başlayıb. Sumqayıt24 bu haqda 11 may tarixində xəbər verir.
Konfrans ümummilli lider Heydər Əliyevin anadan olmasının 100-cü ildönümünə həsr olunub. Burada elm və təhsil müəssisələrinin magistrantları, struktur rəhbərləri və professor-müəllim heyəti iştirak ediblər.
SDU-nun Elm və innovasiyalar üzrə prorektoru, professor Ramazan Məmmədov ulu öndərin Azərbaycan xalqı qarşısında xidmətlərindən danışıb. O qeyd edib ki, konfrans artıq 23-cü ildir ki, SDU-da keçirilir. İştirakçı sayının artması konfransın nə qədər böyük əhəmiyyət kəsb etdiyini göstərir. Bu ilki konfransa 25 elm və təhsil müəssisəsindən 900-ə yaxın məruzə materialları daxil olub. Materialların ilkin ekspertizasından sonra 760 tezis gündəliyə seçilib və konfransın materialları çapa hazır edilib.
Plenar iclasda söz müxtəlif universitetlərin magistrantlarına verilib. SDU-nun magistrantı Leyla Meybullayeva “İ.Şopenin “İrəvan əyalətinin kameral təsviri” kitabında antroponimlərin leksik-semantik xüsusiyyətləri”, ETN-in Kataliz və Qeyri-üzvi Kimya İnstitutunun magistrantı Gülanə Şükürlü “Dəmir və molibdenin alkiltsiklopentadienilkarbonil dimer komplekslərinin sintezi”, Azərbaycan Dövlət Neft və Sənaye Universitetinin magistrantı Nurcan Talıblı “Smart Home İntellektual idarəetmə sistemləri”, Bakı Slavyan Universitetinin magistrantı Əli İsmayılov “Azərbaycan mühacirət ədəbiyyatında qəhrəmanlıq dastanları”, Sumqayıt Dövlət Universitetinin magistrantı Türkan Seyfullayeva “Uzunmüddətli və qısamüddətli aktivlərin fərqlənmə xüsusiyyətləri” mövzularında məruzə ilə çıxış ediblər.
Ev sahibi, təhsil ocağının Doktorantura və magistratura şöbəsinin müdiri, dosent Sabir Xəlilov diqqətə çatdırıb ki, konfransa SDU-dan 251, Bakı Slavyan Universitetindən 214, Naxçıvan Dövlət Universitetindən 92, Odlar Yurdu Universitetindən 60, Azərbaycan Dövlət Aqrar Universitetindən 36, Azərbaycan Dövlət Neft və Sənaye Universitetindən 26, digər elm və təhsil müəssisələrindən isə müxtəlif sayda məqalələr daxil olub.
Qeyd edək ki, konfrans öz işini bölmələr üzrə iki gün onlayn formatda davam etdirəcək.
