Sumqayıtda “Mən Pilotam” adlı layihənin açılış tədbiri keçirilib. Sumqayıt24-ə bu haqda Gənc Müəllimlər Assosiasiyasının şəhər üzrə koordinatoru Sevinc Əsədova-Quliyeva xəbər verib.
Mərasim 25 nömrəli məktəb tərəfindən Təhsildə inkişaf və innovasiyalar VI qrant müsabiqəsində qalib olmuş layihəsi üçün təşkil olunub.
Proqram rəhbəri, ekspert, menecer və təlimçilər iştirakçılara 4 ay davam edəcək layihənin məqsəd və vəzifələri, görüləcək işlər barədə məlumat veriblər. Layihə şagirdlərdə proqramlaşdırma, dron texnologiyalarında idarə bacarıqları ilə yanaşı, məntiqi bacarıqların inkişaf etdirilməsini nəzərdə tutub.
İlk iş olaraq şagird seçimləri həyata keçiriləcək. Seçilmiş məktəblilər “BAKU EXPO“ mərkəzində 6-8 oktyabr tarixlərində baş tutacaq 15-ci Yubiley Beynəlxalq Təhsil Sərgisində iştirak edəcəklər. Ekskursiya ərzində onlara sərbəst tapşırıqlar veriləcək.
Qeyd edək ki, 1 fevral 2023-cü ilə kimi davam edəcək layihənin sonunda şagirdlər öz sərgilərini təşkil edəcəklər. Buraya aidiyyəti qurumların əməkdaşları da dəvət olunacaqlar.
