Sumqayıt Ağır Cinayətlər Məhkəməsində Sumqayıt şəhərində fəaliyyət göstərən Xocavənd rayon Əmirallar kənd tam orta məktəbinin sabiq direktoru Mərkəz Hüseynovun cinayət işi üzrə bəzi detallar açıqlanıb.
İttihama görə, Mərkəz Hüseynov 2009–2023-cü illərdə məktəb direktoru işlədiyi müddətdə dövlət vəsaitini mənimsəmək məqsədilə saxta sənədlər tərtib edib.
Bildirilir ki, fiziki sağlamlıq imkanları məhdud olduğu üçün evdə təhsil almalı olan iki şagirdə faktiki dərs keçirilmədiyi halda, sənədlərdə dərslərin keçirildiyi göstərilib. Bu əsasla müəllimlərin bank kartlarına əməkhaqqı və məzuniyyət ödənişləri köçürülüb, vəsaitlər nağdlaşdırılaraq ona təqdim edilib. Bu epizod üzrə 25 551 manat mənimsənildiyi iddia olunur.
Məlumata görə, 2018-2023-cü tədris illərində keçirilməyən fakultativ məşğələlər və dərnəklər də sənədlərdə keçirilmiş kimi rəsmiləşdirilib. Nəticədə fakultativ məşğələlər üzrə dövlətə 25 892,78 manat, dərnəklər üzrə isə 19 857,24 manat ziyan dəyib.
Beləliklə, ittihama əsasən, Mərkəz Hüseynov evdə təhsil, fakultativ və dərnək məşğələləri ilə bağlı saxta sənədlər tərtib etməklə ümumilikdə 71 301,2 manat dövlət vəsaitini mənimsəyib, həmçinin vəzifə saxtakarlığı törədib.
Məhkəmədə özünü təqsirli bilməyən Mərkəz Hüseynov bildirib ki, evdə təhsil almalı olan şagirdlərə dərslər məktəbdə keçirilib, fakultativ məşğələlər isə faktiki təşkil olunub.
O, müəllimlərdən alınan vəsaitin şəxsi məqsədlər üçün deyil, məktəbdə əlavə sinif otaqlarının yaradılması və təmir işlərinə sərf edildiyini deyib. Bununla yanaşı, həmin vəsaitlə bağlı rəsmi sənədləşmə aparılmadığını etiraf edib.
Təqsirləndirilən şəxs ifadəsinin sonunda dövlət vəsaitini mənimsəmədiyini bildirib. O söyləyib ki, əgər pul mənimsəmiş olsaydı, banklara kredit borcları qalmazdı. Həmçinin müəllimlərin bank kartlarının heç vaxt onda olmadığını və ittihamları qəbul etmədiyini məhkəmənin diqqətinə çatdırıb.
