Sumqayıt şəhərində yerləşən “Unikal” klinikasında xəstənin ölümü ilə bağlı açıqlama verilib. Bu haqda bu gün, 8 yanvar tarixində Oxu.az məlumat yayıb.
Məlumata əsasən, 50 yaşlı Lalə Aslanova 6 yanvar tarixində reanimasiyada dünyasını dəyişib.
5 yanvar tarixində Aslanova klinikaya “Endometrium hiperplaziyası, uşaqlıq qanaxması” diaqnozu ilə daxil olub. Saat 15:00-da “Uşaqlığın ekstripasiyası” cərrahi əməliyyatı icra olunub, əməliyyat fəsadsız keçib.
Daha sonra qadın reanimasiya şöbəsinə yerləşdirilib. Xəstənin vəziyyəti 1 sutka ərzində stabil olub. 6 yanvar saat 15:45-də xəstə qəflətən özünü pis hiss edib. Onun tənəffüsündə çətinləşmə qeyd olunub. Göstərilən bütün tədbirlərə baxmayaraq, xəstənin həyatını xilas etmək mümkün olmayıb.
Ehtimal olunur ki, ölüm səbəbi ağciyər arteriyasının tromboemboliyasıdır.
Klinikanın təkidi ilə cəsəd təşrih üçün Məhkəmə-Tibbi Ekspertiza və Patoloji Anatomiya Mərkəzinə göndərilib.
