Sumqayıtda “Gənclər paytaxtı Sumqayıtda Poeziya günü” adlı tədbir keçirilib.
Report.az-ın məlumatına görə, tədbirdə Xalq artisti Rasim Balayev, Xalq şairləri Vahid Əziz və Sabir Rüstəmxanlı, şair Rüstəm Behrudi, həmçinin yerli yaradıcı ziyalılar iştirak ediblər.
Deputat Səbinə Salmanova çıxışında tədbirin məqsədi barəsində ətraflı danışaraq Sumqayıtdakı yaradıcı mühitin xüsusilə son dövrlərdə xeyli canlandığını vurğulayıb, genişmiqyaslı layihələrin gerçəkləşdirildiyi şəhərin sürətli inkişaf dövrünü yaşadığını diqqətə çatdırıb.
Millət vəkili qeyd edib ki, son dövrlərdə Sumqayıtın vəsf olunduğu çox sayda şeir, mahnı, bədii və rəsm əsərləri yaradılıb.
Daha sonra çıxış edən şəhər rəhbəri Zakir Fərəcov, Xalq artisti Rasim Balayev, Xalq şairləri Vahid Əziz və Sabir Rüstəmxanlı, həmçinin Rüstəm Behrudi, İbrahim İlyaslı digər natiqlər Sumqayıtın ədəbi həyatı haqqında fikirlərini bildiriblər. Toplantıda Xalq şairi Nəriman Həsənzadənin videomüraciəti də yayımlanıb.
Tədbir ədəbi-bədii kompozisiya ilə davam etdirilib.
