Sumqayıt şəhərində şəhid kəşfiyyatçı Balakişi Hüseynovun xatirəsinə həsr olunmuş barelyefin açılışı olub. Bu haqda Qubadlı rayon İcra Hakimiyyəti məlumat yayıb.
Qarabağ hadisələri başlanan gündən B. Hüseynov Əliyar Əliyevin çağırışına qoşulmuş və onun taboruna daxil olmuşdur. Balakişi Hüseynovun son döyüşü Ağdamın Güllücə və Papravənd kəndlərində olmuşdur. O, 1994-cü il yanvarın 6-da həmin kəndlərdə gedən döyüşlərdə ağır yaralanmışdır. Balakişi Hüseynov 24 yanvar tarixində hospitalda vəfat etmişdir. O, ölümündən sonra “Azərbaycan Bayrağı” ordeni ilə təltif edilmişdir.
Barelyef Səməd Vurğun küçəsi 76 ünvanında quraşdırılıb. Açılış mərasimində şəhidin ailə üzvləri və yaxınları, şəhidin döyüş yoldaşları Sadiq Paşayev, Qiyas Babayev, Malik Mehdiyev və Dağbəyi Məhyəddinov, Qubadlı rayon İcra Hakimiyyətinin başçısı Malik İsaqov və əməkdaşları, məktəb direktorları, ictimaiyyət nümayəndələri iştirak ediblər.
Vətən müharibəsində Qubadlı rayonundan 11 şəhid və 40-dan çox yaralı öz adlarını tarixə yazdırıblar.
Foto Qubadlı rayon İcra Hakimiyyəti
