Sumqayıtda yaşayış kompleksinin həyətində şarj stansiyasının tikilməsi sakinlərin narazılığına səbəb olub.
İqtisadiyyat.az-ın məlumatına görə, Mənzil İnşaatı Dövlət Agentliyinin (MİDA) Sumqayıt şəhəri, Bulvar küçəsi, 197 ünvanında yerləşən Sumqayıt yaşayış kompleksinin həyətində şarj stansiyası tikməsi sakinləri narahat edib.
Onların sözlərinə görə, binanın həyətində uşaqlar üçün istifadəyə verilmiş əyləncə sahəsində bir neçə gündür tikinti-quraşdırma işlərinə başlanılıb. Belə ki, həmin ərazinin bir hissəsində yaşıllıq sahəsi sökülüb və orada hamarlama işləri aparılıb. Sakinlər deyir ki, həyətdə nəyin tikiləcəyi barədə onlara heç bir məlumat verilməyib.
Sonradan məlum olub ki, MİDA binanın həyətində uşaqlar üçün istifadəyə verilmiş əyləncə sahəsində elektrik mühərrikli avtomobillər üçün şarj stansiyası inşa edir. Bu isə sakinlərin ciddi narazılığına səbəb olub.
Sakinlər bu tikinti işlərinin qanunsuz həyata keçirildiyini, uşaqların asudə vaxtlarının keçirməsinə, əylənməsinə və istirahətinə maneə törədəcəyini iddia ediblər. Onlar şarj stansiyasının binanın məhz uşaqlar üçün nəzərdə tutulmuş əyləncə sahəsində deyil, digər ətraf ərazilərdə inşa edilməsinin məqsədəuyğun hesab etdiklərini vurğulayıblar.
Buna görə də yaşayış kompleksinin komendantlığı qarşısında tələb irəli sürəcəklərini bildiriblər.
