Sumqayıtda iki tanış arasında yaranan mübahisə cinayətlə nəticələnib.
Demokrat.az-ın əldə etdiyi xəbərə görə, hadisə 76-cı məhəllə ərazisində baş verib. 1972-ci il təvəllüdlü Əfsən həmin ünvanda yerləşən fərdi yaşayış evində aralarında şəxsi münasibətlər zəminində yaranan mübahisə zamanı tanışı Əlinin (adlar şərtidir – red.) baş nahiyyəsinə yumruq zərbələri endirib.
Hadisəni törədən Əfsənin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən təqsirləndirilən şəxs ona elan olunan ittiham üzrə özünü təqsirli bilib.
O, ifadəsində göstərib ki, zərərçəkmiş şəxsin evinə qonaq gedib, birlikdə yeyib-içiblər:
"Evdən çıxarkən Əli məndən siqaret istədi. Bu zaman aramızda mübahisə yarandı. Əli məni tutmaq istədi. Mən də onun sinəsinə və sol çiyin nahiyəsinə zərbə endirdim. Həmin vaxt hər ikimiz də içkili olmuşuq".
Bu cinayət işinə Sumqayıt Şəhər Məhkəməsində baxılıb.
Məhkəmədə məlum olub ki, təqsirləndirilən şəxs zərərçəkmişlə barışıb. Zərərçəkən də ona qarşı şikayətini geri götürüb. Bu səbəbdən təqsirləndirilən şəxsin barəsində olan cinayət təqibinə xitam verilib.
O, cinayət məsuliyyətindən azad edilib.
