Sumqayıt şəhər 21 nömrəli məktəb əsaslı təmirdən sonra istifadəyə veriləcək.
Bu barədə məlumatı həmin məktəbin direktoru Qədir Mikayılov “Azərbaycan müəllimi” qəzetinə verib.
Qeyd edilib ki, 1971-ci ildən fəaliyyət göstərən məktəbin köhnə binası 2024-cü ilin sentyabr ayından Elm və Təhsil Nazirliyinin sifarişi ilə əsaslı təmirə bağlanıb. Hazırda məktəbin 1900 nəfər şagirdi 30, 41, 31, 33 nömrəli tam orta məktələrdə, eyni zamanda, Sumqayıt şəhərində yerləşən Qubadlı şəhəri 1 nömrəli, Qubadlı rayon Kavdadıq kənd tam orta məktəblərində tədrislərini davam etdirirlər. Nisbətən uzaq ərazilərdə yerləşən məktəblərə şagirdlərin daşınması üçün MÜDTA və Abşeron-Xızı Regional İdarəsinin dəstəyi ilə xidməti avtobuslar ayırılıb.
Q.Mikayılov bildirib ki, tədris ocağı iki korpusdan ibarətdir. Birinci korpus iki, digər korpus isə dördmərtəbəli olacaq. İkimərtəbəli korpusda inzibati otaqlar – müasir kitabxana, akt və idman zalları, yeməkxana yerləşəcək. Dördmərtəbəli korpusda isə yeni standartlara uyğun 39 sinif otağı, fizika, kimya, biologiya laborotoriyaları, iki informatika kabineti fəaliyyət göstərəcək.
Təhsil müəssisəsinin yeni binası 1176 şagirdlikdir. Məktəb binasının növbəti tədris ilində istifadəyə verilməsi gözlənilir.
