3 nömrəli şəhər xəstəxanasında mülki müdafiə məşqi keçirilib. Sumqayıt24 bu haqda 21 fevral tarixində Sumqayıt Tibb Mərkəzinə (STM) istinadən xəbər verir.
"Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə olunmasının təşkili" mövzusunda olan təlimdə STM-in Mülki müdafiə bölməsinin aparıcı mütəxəssisi Bənövşə Sayilova çıxış edib. Bildirilib ki, məqsəd xilasetmə və digər təxirəsalınmaz işlərin yerinə yetirilməsi üzrə praktiki vərdişləri əməkdaşlara öyrətməkdir.
Xəstəxananın baş həkimi, Mülki müdafiə rəhbəri Elçin Quliyev şərti siqnalı verərək, məşqin başlanmasını elan edib. Təlim 3 siqnal üzrə həyata keçirilib.
İlk siqnalda zəlzələ nəticəsində tibb ocağında dağıntılar və tələfatın olduğu bildirilib. İkinci siqnalda zəlzələnin təsirindən Etilen-polietilen zavodunda 10 tonluq xlor çəninin dağılaraq ətrafa yayıldığı və nəticədə kimyəvi zəhərlənmələrin baş verdiyi qeyd olunub. Sonuncu siqnalda isə xəstəxananın elektrik xətlərindəki qısaqapanmadan yanğının yarandığı vurğulanıb.
Mülki müdafiə qərargahının üzvləri təhlükələrin aradan qaldırılması istiqamətində həyata keçirilən tədbirlərdən geniş bəhs ediblər.
Sonda məşqin təhlili aparılıb. [modula id="32136"]
