Sumqayıt şəhəri 13-cü mikrorayonda baş verən partlayışdan dörd ay keçməsinə baxmayaraq, binada hələ də bərpa işlərinə başlanılmayıb. Zərərçəkmiş sakinlər müvəqqəti olaraq kirayə mənzillərə yerləşdirilsə də, onların yaşayış vəziyyəti və gələcək taleləri ilə bağlı ciddi narahatlıqları var.
Sakinlər Sumqayit24.az-a bildiriblər ki, onlara 6 aylıq kirayə haqqı ödənilib. Lakin artıq bu müddətin 4 ayı geridə qalıb və gələcəkdə onların kirayə haqqının ödənilib-ödənilməyəcəyi məlum deyil. Bu qeyri-müəyyənlik onların sosial və maddi vəziyyətinə ciddi təsir göstərir.
Bundan əlavə, binanın hazırkı vəziyyəti də sakinləri narahat edir. Onların sözlərinə görə, partlayışdan sonra yalnız binanın çökməməsi üçün dayaqlar qurulub, amma heç bir əsaslı təmir və bərpa işlərinə başlanılmayıb.
Sakinlər ərazidə təhlükəsizlik tədbirlərinin görülmədiyini və binanın ətrafında qoruyucu baryerlərin belə qurulmadığını bildirirlər. Bu isə yaxınlıqdan keçən insanlar üçün ciddi təhlükə yaradır, çünki bina uçma təhlükəsi ilə üz-üzədir.
Sakinlər aidiyyəti qurumlara müraciət etsələr də, indiyə qədər heç bir konkret tədbir görülməyib. Onlar vəziyyətlə bağlı rəsmi cavab və təhlükəsiz hesab edilən blokların sakinlərinə evlərinə qayıtmağa icazə verilməsini, ciddi zərər görmüş mənzillərin sahiblərinə isə yeni mənzillərlə təminat və ya təmir işlərinin aparılması ilə bağlı konkret qərarın açıqlanmasını gözləyirlər...
Hazırda kirayədə yaşamağın onlar üçün həm maddi, həm də sosial baxımdan çətin olduğunu vurğulayan sakinlər, problemin tezliklə həll olunmasını və yaşayış şəraitlərinin bərpa edilməsini tələb edirlər.
