Balıq ovu mövsümü sentyabrın 1-dən açıq elan olunur.
Sumqayit24.az xəbər verir ki, bunu "Balıqçılıq və Akvakultura Mərkəzi" publik hüquqi şəxsin direktoru Ceyhun Əliyev bugünkü mətbuat konfransında deyib.
O bildirib ki, kürüləmə dövrü ilə əlaqədar sənaye məqsədli balıq və digər su bioresurslarının ovuna qoyulmuş moratoriumun müddəti başa çatır:
"Sentyabrın 1-dən müəyyən edilən qaydalara uyğun olaraq balıq ovu müddəti açıq elan olunur.
Azərbaycan Respublikası Nazirlər Kabinetinin 2017-ci il 2 iyun tarixli 243 nömrəli qərarı ilə təsdiq edilmiş "Balıq və digər su bioresursları ovunun Qaydaları"na əsasən, kürütökmə dövrü ilə əlaqədar sənaye məqsədilə balıq və digər su bioresurslarının ovuna Xəzər dənizində, Kür çayında, Sarısu gölündə, Mingəçevir, Şəmkir, Araz və Yenikənd su anbarlarında tətbiq olunan moratorium sentyabrın 1-də başa çatır".
