Müəllimlik sadəcə bir peşə deyil, istedaddır, fədakarlıqdır, səbrdir.
Sumqayıt24 Qubada uşaqlara dərs deyən gənc sumqayıtlı müəllim ilə həmsöhbət olub.
- Bir neçə cümlə ilə özünüz haqqında məlumat verərdiniz.
Mənsimova İlahə Elbrus qızı, 1999-cu ildə Sumqayıt şəhərində anadan olmuşam. 2016-2020-ci illərdə Azərbaycan Dillər Universitetinin xarici dil (ingilis dili) müəllimliyi ixtisası üzrə təhsil almışam. 2020-ci ildə MİQdə (Müəllimlərin işə qəbulu üzrə müsabiqə) iştirak edərək Yardımlı rayonu Arvana kənd məktəbində ingilis dili müəllimi kimi fəaliyyətə başlamışam.
2021-ci ildə yerdəyişmə edərək Quba rayonu Yerfi kənd məktəbində işləməyə başlamışam. Eləcə də, 2021-ci ildə Bakı Slavyan Universitetində magistratura səviyyəsi üzrə təhsilə başlamışam.
- Niyə müəllimliyi seçmisiniz?
Müəllimlik nə qədər çətin olsa da, bir o qədər də önəmli, maraqlı ixtisasdır. Mən peşəmi, şagirdlərim olandan sonra daha çox sevdim. Onlar mənim xoşbəxtliyimdir. Bacardığımdan çox çalışıram ki, şagirdlərimə nəsə öyrədim.
- Bəs niyə kənd məktəbində işləməyi seçdiniz?
Bəlkə də çoxu düşünür ki, kənd məktəbinə az bal toplayan müəllimlər gedir, amma mən universitetin son ilində qərar vermişdim ki kəndə, hətta ən ucqar kəndlərə gedib, orada dərs deyəcəm. Səbəbini soruşanda isə deyirdim ki, orada mənə daha çox ehtiyac var. Çünki şəhərlərdə kifayət qədər müəllim var, lakin kəndlərdə elə fənnlər var ki, heç keçirilmir. Necə deyərlər, niyyətin hara, mənzilin ora. Ona görə də mən əvvəlcə Yardımlı, daha sonra isə Quba kənd məktəbini seçdim.
- Bəs çətin deyil həm magistr təhsilini almaq, həm də başqa rayona gedib dərs demək?
Bəli, təbii ki, çox çətindir. Mən hər həftə Qubaya gəlib dərsimi deyib, daha sonra birbaşa magistr dərslərim üçün Bakıya gedirəm. Təbii ki, hər gün universitetdə ola bilmədiyim üçün qayıblarım var. Yol xərcim çox çıxır, çünki kənddən maşın tapmaq çətindir, çox yoruluram, amma yolumu gözləyən, məni sevən şagirdlərimi görəndə, bütün yorgunluğumu, hər şeyi unuduram.
Foto Sumqayıt24
