Sumqayıtda fəaliyyət göstərən Təcili Təxirəsalınmaz Tibbi Yardım Stansiyasına ay ərzində daxil olan müraciətlərin sayı açıqlanıb. Sumqayıt24 bu haqda 17 iyun tarixində AZƏRTAC-a istinadən xəbər verir.
Şəhər Tibb Mərkəzinin direktor müavini İlkin Namazovun sözlərinə görə, stansiyaya qeyd olunan müddət ərzində orta hesabla 10 minə yaxın müraciət daxil olur. İkinövbəli iş rejimində işləyən tibb ocağında hər növbədə 25 tibbi briqada çalışır.
O, hazırda stansiya da daxil olmaqla, 3 məntəqənin fəaliyyət göstərdiyini, əlavə olaraq Novxanı bağlarında və “Stansiya Sumqayıt” yaşayış massivində yeni məntəqələrin açılacağını bildirib.
“Hazırda 116 yüksəkixtisaslı həkim və 160 tibb bacısı gecəli-gündüzlü sumqayıtlıların sağlamlığı keşiyində dayanır. Çağırışa vaxtında çatmaq üçün stansiyanın 29 avtomobildən ibarət avtoparkı da mövcuddur”, - deyə İlkin Namazov əlavə edib.
