Gəncə şəhərində Yeni il və Dünya Azərbaycanlılarının Həmrəyliyi Günü ilə bağlı əvvəlcə rəsmi tədbirin keçirilməyəcəyi açıqlansa da, ictimai qınaq və sosial şəbəkələrdə səsləndirilən narazılıqlardan sonra mövqedə dəyişiklik edilib. Nəticədə Gəncə Şəhər İcra Hakimiyyəti 31 dekabr gecəsi Heydər Əliyev adına Meydanda atəşfəşanlığın təşkil olunacağını elan edib.
Bu hadisə ölkənin digər şəhərlərində də müzakirələrə səbəb olub. Xüsusilə Sumqayıtda yaşayan sakinlər Gəncə nümunəsini xatırladaraq sual edirlər: Sumqayıt Şəhər İcra Hakimiyyəti də mövqeyini dəyişəcəkmi?
Xatırladaq ki, Sumqayıt Şəhər İcra Hakimiyyəti bir müddət öncə Sumqayit24.az-a açıqlamasında Yeni il və Dünya Azərbaycanlılarının Həmrəyliyi Günü ilə bağlı şəhərdə hər hansı rəsmi tədbirin, o cümlədən atəşfəşanlığın keçirilməsinin nəzərdə tutulmadığını bildirmişdi.
Lakin Gəncədə baş verən son hadisələr göstərir ki, ictimai rəy və vətəndaşların narazılığı yerli icra strukturlarının qərarlarına təsir göstərə bilir. Sosial şəbəkələrdə artıq Sumqayıtla bağlı da müzakirələr başlayıb və şəhər sakinləri bayramın rəsmi şəkildə qeyd olunmamasından narazılıqlarını ifadə edirlər.
Hazırda əsas sual açıq qalır: Gəncə Şəhər İcra Hakimiyyəti kimi, Sumqayıt Şəhər İcra Hakimiyyəti də qərarını yenidən nəzərdən keçirəcəkmi?
Məsələ ilə bağlı rəsmi mövqe dəyişəcəyi təqdirdə, Sumqayit24.az mövzunu diqqətdə saxlayaraq oxuculara operativ məlumat verəcək.
