Vətənimizin oğulları müxtəlif vaxtlarda Azərbaycanın ərazi bütövlüyünü qorumaq üçün canı bahasına vuruşublar. O igidlərdən biri də sumqayıtlı, gənc şəhid Cəbrayıl Dövlətzadədir.
44 günlük Vətən müharibəsində iştirak edən Cəbrayıl sentyabrın 28-də Murovdağ döyüşləri zamanı Kəlbəcər rayonu ərazisində şəhid olub. Qeyd edək ki, çox insan onu erməni generalını boğan qəhrəman kimi tanıyır.
Sumqayit24.az-ın əməkdaşı şəhidin atası ilə həmsöhbət olub. Şəhidin atası Dövlət bəy qəhrəman oğlu barədə danışıb, eyni zamanda indiki gənclərə örnək də verib.
- Zəhmət olmasa, özünüzü təqdim edin.
- Mən Dövlət Dövlətzadə şəhid Cəbrayıl Dövlətzadənin atasıyam. Sadə, zəhmətkeş bir ailədənəm. Ömrümü halal çörək qazanmağa, övladlarımı böyütməyə həsr etmişəm.
- Cəbrayıl uşaqlıqda necə bir övlad olub? Bir ata kimi onu necə xatırlayırsınız?
- Cəbrayıl elə uşaqlıqdan fərqli idi. Sözəbaxan, mehriban, mərhəmətli bir uşaq olub. Həmişə kiminsə yükünü yüngülləşdirməyə, kiməsə dayaq olmağa çalışıb. Mənim üçün o, həm ağıllı övlad, həm də ürəyi dağ boyda olan bir igid idi.
- Oğlunuzun Vətən müharibəsində iştirakı sizdə hansı hissləri oyatmışdı? Onu hər kəsin qürurla danışacağı qəhrəman olacağını əvvəlcədən hiss etmişdinizmi?
- Düzdür, bir ata üçün övladını müharibəyə yola salmaq ağırdır. İçimdə narahatlıq da var idi, fəxarət də. Onu da bilirdim ki, Cəbrayıl qorxmazdır və heç nədən çəkinmir. Mən hiss edirdim ki, o, Vətən üçün igidlik göstərəcək. Lakin dillərdə dolaşacaq qədər böyük qəhrəmanlıq edəcəyini təsəvvür etməmişdim. Bir sözlə, oğlum Cəbrayıl bizim ailənin, kəndimizin, Vətənimizin qürurudur.
- Cəbrayıl ilə son danışığınız yadınızdadırmı? Həmin an sizin üçün nə ilə yadda qalıb?
- Son danışığımız telefonla oldu. Mən səsini eşidəndə ürəyim nədənsə narahat oldu, lakin o, hisslərini gizlətməyi bacarırdı və həmişəki kimi sakit idi. Çətinliklərini deyib bizi narahat etmək istəmirdi. Sadəcə “narahat olmayın, hər şey yaxşıdır” dedi. O, qorxmadan ölümün gözünə baxa-baxa bizi qorumağa çalışdı və mənim üçün də o an unudulmazdır.
- Cəbrayıl daha çox erməni generalını boğan qəhrəman kimi tanınır. Bizim bundan başqa onun haqqında bilmədiyimiz hansı qəhrəmanlıqları var?
- Bəli, o məşhur hadisəni hamı bilir. Eyni zamanda, Cəbrayılın kimsənin bilmədiyi qəhrəmanlıqları daha çoxdur. Döyüş yoldaşlarının çoxu ailəli idi. Onlara deyirdi: “sizin evdə övladlarınız gözləyir, siz geri dönün, bu işi mən tək başına da edə bilərəm”.
Yəni, yalnız düşmənlə mübarizə aparmadı, həm də dostlarını qorudu, özünü qurban verdi. Mənim üçün bu fədakarlıq onun ən böyük qəhrəmanlıqlarından biridir.
- Bugünkü gənclərə Cəbrayılın həyatından hansı hadisəni örnək göstərmək istərdiniz?
- Mən gənclərə onun Vətən sevgisini, etdiyi fədakarlıqları örnək göstərərdim. O, özünü düşünmədən torpağı, xalqı üçün canını verdi. Bu günün gəncləri bilməlidirlər ki, azadlıq və qələbə qəhrəmanların qanı bahasına qazanılıb. Düşünürəm ki, Cəbrayıl adı onlara yol göstərən bir çıraq olmalıdır.
