Noyabrın 5-i gün ərzində və 6-na keçən gecə Ermənistan silahlı qüvvələrinin bölmələri cəbhənin müxtəlif istiqamətlərində Ordumuzun mövqelərini və yaşayış məntəqələrimizi müxtəlif atıcı silahlar, top və minaatanlardan atəşə tutdu.
Döyüşlər əsasən cəbhənin Ağdərə, Ağdam, Xocavənd və Qubadlı istiqamətlərində müxtəlif intensivliklə davam edirdi. Düşmən şəxsi heyət və hərbi texnikada itkilər verərək geri çəkilirdi.
Məğlubiyyətə uğrayan düşmən təxribatlara əl atırdı. Bu dəfə Berd, Çəmbərək və Vardenis rayonları istiqamətindən Azərbaycanın Tovuz, Gədəbəy və Daşkəsən rayonlarında yerləşən hərbi bölmələrimizin mövqelərini fasilələrlə atəşə tutdu.
Saat 08:00-dan başlayaraq isə Ermənistan silahlı qüvvələrinin bölmələri Tərtər şəhərini, rayonun Qazyan və Hüsənli kəndlərini, eləcə də Goranboy rayonunun Tapqaraqoyunlu kəndini atəşə tutdu.
Düşmənin bu təxribatlarına cavab isə döyüş meydanında verilirdi. Tərtər rayonunun işğal olunmuş Göyarx (keçmiş Levonarx) kəndi ərazisində yerləşən düşmən atış nöqtələrinə çıxarılan minaatanların heyəti bölmələrimizin dəqiq atəşi ilə məhv edildi.
Tərtərin Qazyan, Qaynaq, Qapanlı və Hüsənli kəndlərini artilleriya atəşinə tutan düşmənə isə daha ağır zərbə endirildi. Ermənistan silahlı qüvvələrinin Ağdərə yaxınlığında yerləşən atış mövqelərinə çıxarılan D-30 haubitsasının heyəti Ordumuzun dəqiq atəşi ilə vuruldu.
Müdafiə Nazirliyi həmin gün Füzuli rayonunun işğaldan azad edilmiş kəndlərindən yeni görüntülər yaydı.
Böyük qələbəyə, Qarabağa qovuşmağımıza isə artıq cəmi üç gün qalırdı.
