Xarici diplomatik korpusun nümayəndələri Sumqayıta gəliblər. Sumqayıt24 bu haqda 17 iyun tarixində Scip.az-a istinadən xəbər verir.
“Əcnəbi Diplomatlar üçün Xarici Siyasət Proqramı - 2022” adlı beynəlxalq kursun ölkəmizdə səfərdə olan iştirakçıları Kimya Sənaye Parkı ilə tanış olublar. İqtisadi zonaların inkişafı agentliyinin idarə heyətinin sədri Elşad Nuriyev onlara mövcud sənaye zonaları və aqroparklar barədə məlumat verib.
Bildirilib ki, sənaye zonalarında sahibkarlıq fəaliyyətinin inkişafı üçün əlverişli investisiya və biznes mühiti yaradılıb, xarici və yerli investorlar bu imkanlardan yararlana bilərlər.
Sonda qonaqlar burada görülən işlərlə və Sənaye Parkının rezidenti, “Azerfloat” QSC-nin Şüşə istehsalı müəssisəsinin fəaliyyəti ilə tanış olublar.
