Azərbaycan tarixinin ən faciəli və dəhşətli səhifələrindən biri olan Xocalı soyqırımından 34 il keçir.
1992-ci il fevralın 25-dən 26-na keçən gecə Ermənistan silahlı qüvvələri beynəlxalq hüququn norma və prinsiplərini kobud şəkildə pozaraq, keçmiş sovet ordusunun Xankəndidə yerləşən 366-cı alayının iştirakı ilə Xocalı şəhərinə hücum edib, dinc əhaliyə qarşı misli görünməmiş qəddarlıq törədib.
Xocalı soyqırımı zamanı 106 qadın, 63 uşaq və 70 qoca daxil olmaqla, ümumilikdə 613 nəfər sırf azərbaycanlı olduqlarına görə amansızcasına qətlə yetirilib. Bundan başqa, 487 dinc sakin ağır yaralanıb, 1275 nəfər isə girov götürülüb.
Ermənistanın azərbaycanlılara qarşı həyata keçirdiyi Xocalı soyqırımı, eləcə də Bağanıs Ayrım, Qaradağlı, Ağdaban və Başlıbel qətliamları ilə müşayiət olunan hərbi təcavüz nəticəsində torpaqlarımızın təxminən 20 faizi işğal olunub. Bu proses zamanı 20 min vətəndaşımız həyatını itirib, 50 mindən çox insan yaralanaraq əlil olub və Azərbaycan ağır humanitar faciə ilə üz-üzə qalıb.
Ermənistanın daim mülki əhalini hədəf seçən təxribatlarına və hərbi təcavüzünə cavab olaraq, 2020-ci il sentyabrın 27-də Azərbaycan xalqı Vətən müharibəsinə qalxdı və düşmənə sarsıdıcı məğlubiyyət yaşadaraq əzəli torpaqlarını azad etdi.
