Sumqayıt Yaşıllaşdırma İdarəsi tender elan edib. Sumqayıt24 bu haqda 19 avqust tarixində Qaynarinfo.az-a istinadən xəbər verir.
Yaşıllıqların salınması ilə bağlı tenderi bu dəfə də "Saffari Plus" MMC qazanıb. Şirkətin qiymət təklifi 294.292 manat olub.
"Saffari Plus" avqustun 12-də də sözügedən qurumun eyni tenderi üzrə qalib seçilmişdi. Həmin tender üzrə qiymət təklifi 293.230 manat olmuşdu.
Ötən il isə şirkət Sumqayıt Şəhər Mənzil Kommunal Təsərrüfatı İstehsalat Birliyinin (MKTİB) 3 tenderinin qalibi seçilib. Bu müsabiqələr də yaşıllıqların salınması ilə bağlı idi. Satınalma müqavilələrin ümumi maliyyə dəyəri 855.382 manatdır.
"Saffari Plus" MMC vergi qeydiyyatına 26 yanvar 2023-cü ildə alınıb. Şirkət bir neçə ay sonra tenderlərə qatılmağa başlayıb. Əsasən Sumqayıt Yaşıllaşdırma İdarəsinin keçirdiyi satınalma müsabiqələrində qalib gəlib.
MMC-nin qanuni təmsilçisi Nuranə Zeynalovadır. O, həm də "4 MM Aqro" MMC-nin qanuni təmsilçisidir. Bu şirkət də eyni tarixdə vergi qeydiyyatına alınıb.
Dövlət Vergi Xidmətinin reyestr məlumatlarında adıçəkilən şirkətlərin hüquqi ünvanı qeyd edilməyib.
Açıq mənbələrdə "Saffari Plus" MMC və "4 MM Aqro" MMC barəsində heç bir məlumata rast gəlinmir. Nuranə Zeynalova haqqında hər hansı məlumat yoxdur. Bu isə şirkətlərin sadəcə tender əməliyyatları üçün yaradıldığını, Nuranə Zeynalovanın isə təmsilçiliyinin formal olduğuna dair şübhələri artırır.
Sumqayıt MKTİB-nin Yaşıllaşdırma İdarəsinin rəisi İlyas Həsənovdur. O, Qaçqınların və Məcburi Köçkünlərin İşləri üzrə Dövlət Komitəsinin keçmiş sədri, baş nazirin sabiq müavini Əli Həsənovun qardaşıdır.
