Bitki çayları rahatlamağa, yuxuya daha asan getməyə və yuxunun keyfiyyətini yaxşılaşdırmağa kömək edə bilər. Yuxu problemləri zamanı istifadə olunan bitkilər arasında pişikotu, badrənc və lavandanın adı çəkilir.
Bunu qastroenteroloq Yevgeni Belousov açıqlamasında deyib.
Həkim bildirib ki, bəzi bitki çayları və onların qarışıqları sinir sisteminə sakitləşdirici təsir göstərərək gərginlik və narahatlığın azalmasına, nəticədə isə yuxuya getməyin asanlaşmasına şərait yarada bilər. Onların təsiri birbaşa yuxugətirici olmaqdan daha çox insanın rahatlamasına və xarici qıcıqlandırıcılara qarşı həssaslığın azalmasına yönəlir.
Belousovun sözlərinə görə, yuxusuzluq zamanı ən çox istifadə edilən bitkilərdən biri pişikotudur. Bu bitkinin yuxuya getmək üçün lazım olan vaxtı azaltmağa və yuxunun keyfiyyətini yaxşılaşdırmağa kömək edə biləcəyi bildirilir.
Badrənc isə stressin azalmasına kömək edən antioksidantlarla zəngindir. Həkim bir stəkan ilıq suya 3-4 badrənc yarpağı əlavə edib 15 dəqiqə dəmləməyi və alınan çayı yatmazdan təxminən bir saat əvvəl içməyi məsləhət görüb.
Lavanda da sakitləşdirici xüsusiyyətləri ilə seçilir. Tərkibində olan efir yağlarının emosional gərginliyin azalmasına, yuxunun keyfiyyətinin yüksəlməsinə və daha tez yuxuya getməyə müsbət təsir göstərə biləcəyi qeyd olunur.
Həkimin fikrincə, bitki çaylarının müntəzəm qəbulu yuxunun daha rahat olmasına və səhərlər oyanmağın asanlaşmasına kömək edə bilər. Bitkilərin adətən bir çay qaşığı miqdarında 300 ml qaynar suda dəmlənməsi və yatmazdan 2-3 saat əvvəl qəbul edilməsi tövsiyə olunur.
Bununla belə, bitki çaylarının təsiri hər insanda eyni olmaya bilər. Bütün bitkilərin uzun müddət və istənilən miqdarda istifadəsinin zərərsiz olduğu düşüncəsi də doğru deyil. Xüsusilə dərman qəbul edən, hamilə olan və ya xroniki xəstəliklərdən əziyyət çəkən şəxslər bitki tərkibli vasitələrdən müntəzəm istifadə etməzdən əvvəl həkimlə məsləhətləşməlidirlər.
Mənbə: Gazetа.ru
