Xəbər verdiyimiz kimi, Sumqayıtda yaşayış binalarının yaxınlığında aparılan tikinti işləri narahatlığa səbəb olub.
Fövqəladə Hallar Nazirliyinin mətbuat xidmətindən Sumqayit24.az-a bildirilib ki,
Sumqayıt şəhəri, 15-ci məhəllə ərazisində yerləşən, istismar müddəti başa çatmış, qəzalı vəziyyətdə olan binaların, yataqxanaların sökülərək, yerində "KM GROUP" MMC tərəfindən müasir üslubda çoxmərtəbəli yaşayış binalarının tikintisinin layihələndirilməsinə Sumqayıt Şəhər İcra Hakimiyyəti Başçısının 03 aprel 2025-ci il tarixli sərəncamı verilmişdir.
"Lakin sifarişçi tərəfindən icazəverici sənədlər təqdim edilməmişdir. Azərbaycan Respublikası Şəhərsalma və Tikinti Məcəlləsinin tələbləri pozulmaqla tikinti işləri (qazıntı) aparıldığı üçün FHN-in Tikintidə Təhlükəsizliyə Nəzarət Dövlət Agentliyinin mütəxəssisləri tərəfindən tikinti işlərinin dayandırılması barədə 26 sentyabr 2025-ci il tarixli "Qərar" verilmiş və "Qərar" sifarişçiyə təqdim edilmişdir.
Sifarişçi "KM GROUP" MMC tərəfindən "QƏRAR"ın tələblərinə əməl olunmadan tikinti işləri davam etdirildiyinə görə tərəfimizdən inzibati protokol tərtib olunmuşdur.
Hal-hazırda tikinti işləri aparılmır.
"QƏRAR"ın surəti əraziyə nəzarət etmək üçün yerli icra hakimiyyəti və hüquq mühafizə orqanlarına göndərilmişdir", -deyə qurumdan bildirilib.
***
Sumqayıtda yaşayış binalarının yaxınlığında aparılan tikinti işləri narahatlığa səbəb olub.
Sumqayit24.az xəbər verir ki, bu barədə sosial şəbəkələrdə paylaşım edilib.
İddiaya görə, 15-ci məhəllədə tikinti işləri zamanı digər binanın çökməməsi üçün bir neçə bərkidici tədbir görülüb.
Lakin sakinlər bu tədbirlərin yetərli və təhlükəsiz olmadığını düşünürlər. Onlar vəziyyətin ciddi risk yaratdığını bildirərək, aidiyyəti qurumların əraziyə baxış keçirməsini tələb edirlər.
Qeyd edək ki, məsələ ilə bağlı Fövqəladə Hallar Nazirliyinə sorğu ünvanlanıb.
