“Yuxu” qrupu 1988-ci ildə Sumqayıt şəhərində yaradılıb. Qrupun adını onun yaradıcısı, bass-gitaraçı İbrahim Emin təklif edib. Bu fikir qrup üzvlərinin tez-tez yuxularında özlərini artıq məşhur və bacarıqlı musiqiçilər kimi görməklərindən yaranıb.
Qrupun ilk çıxışları Sumqayıtın “Kimyaçılar” sarayında baş tutub. 1989-cu ildə “Yuxu” “Qızıl Payız” festivalının qalibi olub və bu vaxtdan da məşhurlaşmağa başlayıb. Onları hamıya tanıdan ifa isə “Xəzərin sahilində” mahnısı idi. Mahnının sözlərini İbrahim Eminin atası yazıb. “...mən sözlərə atamın icazəsi ilə bəzi düzəlişlər etmişəm. Məsələn, orda “Xəzərin sahilində” əvəzinə “Sumqayıt bağlarında” yazılmışdı”, - İbrahim Emin Apa.az-a müsahibəsində deyib. “Xəzərin sahilində” mahnısına klip çəkməyə isə keçmiş ANS televiziyasının prezidenti Vahid Mustafayev köməklik göstərib, və klip ilk dəfə elə həmin televiziyada yayımlanıb.
Festivalda qalib gəldikdən sonra qrup İstanbula yollandı və qısa müddət ərzində tanınmağa başladı. Türkiyəyə ilk dəfə gələndə qrup üzvlərinin ümumilikdə 100 dollar pulu olub. Qazanc üçün onlar İstanbulun Laləli qəsəbəsində dəri gödəkcə satan mağazada işləyirdilər. Bu zaman “Xəzərin sahilində” klipini fransız xanım Paskal görüb, onları Fransada fəaliyyət göstərməyə dəvət etdi. Lakin Fransada müvəqqəti yaşamaq üçün sənədləri ala bilməyən qrup üzvləri Türkiyədə qalaraq, fəaliyyətlərini davam etdirdilər.
“Yuxu”nun ilk iki albomu Azərbaycanda yazılsa da bütün albomlar (“Xəzərin sahilində” - 1988-ci il, “Sumqayıt” - 1994-cü il, “Ölümə çarə yox” - 1998-ci il) ilk dəfə Türkiyədə yayımlanıb.
1999-cu ildə İstanbulda baş verən zəlzələdən sonra Türkiyədə musiqi sahəsində böhran yaşanmağa başladı. Bundan sonra, 2001-ci ildə “Yuxu” qrupu fəaliyyətini dayandırdı. Sonradan qrup üzvləri fərqli sahələrdə işləməyə başladılar. Vokal ifaçısı Zaur Abdullayev Moskvaya köçdü, zərb alətləri ifaçısı Çingiz Eyvazov Bakıda tatu sənəti ilə məşğul olmağa başladı, gitaraçı Namiq Nağdəliyev İstanbulda qalaraq öz musiqi fəaliyyətini fərqli türk qruplarında davam etdi. “Yuxu” qrupunun yaradıcısı, bass-gitaraçı İbrahim Emin Sumqayıta qayıtdı və 2004-cü ildə “Sirr” qrupunu yaratdı. O, 2 iyul 2019-cu ildə Sumqayıt şəhərində vəfat edib.
Ədəbiyyat:
