Novruz bayramı dörd əsas çərşənbəni özündə birləşdirir. Bunlardan ikincisi Od çərşənbəsidir. Od çərşənbəsi adət-ənənələrə görə “Üsgü çərşənbə” də adlanır.
Odun, tonqalın olması istiliyin mənasını ifadə edir və yazın gəlişi, havaların isinməsinin göstəricisidir. Hər evin və binanın qarşısında tonqalın yandırılması həmin ilin isti, bərəkətli keçməsinə nişandır.
Od çərşənbəsinin mahiyyətində odun qədimdən müqəddəs sayılması, odun insanı hər cür pisliklərdən, şərdən təmizləyəcəyinə, xeyrin qələbə çalacağına inam ifadə olunur. Qədimdən türk xalqları tonqal qalamaqla, şad günlərdə şənliyə, düşmənin hücumu zamanı isə müdafiə olunmağa toplaşmaq üçün işarə verirmişlər.
