Yel çərşənbəsi boz ayın üçüncü çərşənbəsidir. Xalq arasında bu çərşənbəyə “külək oyadan çərşənbə”, “yelli çərşənbə” və s. deyilir.
Təbiətdə oyanmanın, canlanmanın birinci şərti, sözsüz ki, havanın qızması ilə əlaqədardır. Çərşənbə vaxtı qalxan isti külək təbiəti qışın durğunluğundan oyadır. Bahar yağışları torpağa can verməyə başlayır.
Yel çərşənbəsində qadınlar axır çərşənbə üçün hazırlıqlar görürlər. Ev əşyaları təmizlənir, xalça-palaz çırpılır, yorğan-döşək havaya verilir. Yel çərşənbəsi günü tonqallar qalanır, evlərdə südlü plov bişirilir. Süfrəyə daha çox quru meyvə və dənli bitkilərdən hazırlanmış çərəzlər düzülür.
