Sumqayıt Şəhər İcra Hakimiyyətinin binası bir vaxtlar “Yaşıl bina” kimi tanınırdı.
Sumqayit24.az xəbər verir ki, sözügedən memarlıq nümunəsi şəhərin simvollarından biri sayılırdı. 1958-ci ildə tikilən binada Sumqayıt şəhər Partiya Komitəsi və şəhər xalq Deputatları Soveti İcraiyyə Komitəsi yerləşirdi.
60-cı illərin əvvəllərində, Xəzər dənizindən əsən duzlu şimal küləyinə görə binanın birinci mərtəbəsi həmişə nəmli olardı. Bu problemi həll etmək üçün Kazan şəhərindən “daş sarmaşıqları” – “plyuş” kolları gətirilib və binanın ön hissəsində perimetr boyu əkilib.
Nəticədə yaşıl sarmaşıq binanın fasadını tamamilə örtüb, onu şəhərin, hətta SSRİ-nin ən seçilən infastrukturlarından birinə çevirmişdi.
Şəhərə gələn turistlər bu gözəl memarlıq nümunəsini gördükdə heyran qalır və xatirə şəkilləri çəkdirərdilər. Bundan əlavə Almaniyanın Sumqayıtla qardaşlaşmış Lüdviqshafen şəhərində bu ”Yaşıl bina”nı əks etdirən marka da buraxılıb.
Lakin 2010-ci ildə sarmaşıqları hissə-hissə saraldıqları üçün binadan götürdülər.
Buna baxmayaraq, 2016-cı ildən etibarən burada yenidən sarmaşıq kolları əkilib və bina öz keçmiş görkəmini bərpa etməyə başlayıb.
