Məscid Sumqayıtın Corat qəsəbəsində, Sülh küçəsində, keçmiş qəbiristanlığın yerində inşa edilib.
Azərbaycan Respublikasının Məscidlər ensiklopediyasında məscidin hicri-qəməri təqvimi ilə 409-cu (1018-1019-cu) ildə inşa olunduğu yazılıb. Azərbaycan Respublikası Mədəniyyət Nazirliyinin rəsmi saytında isə məscidin X əsrdə, Hacı Əli adlı şəxs tərəfindən tikildiyi qeyd olunub.
Məscidin ibadət zalı günbəzdə bir-birinə birləşən 4 tağdan ibarətdir. Günbəzin diametri 5 metr təşkil edir və üzərində 4 düzbucaqlı pəncərə var. Burada eyni zamanda 500 nəfər ibadət edə bilər. Məsciddə kişi və qadınlar üçün ayrıca dəsnamazxanalar mövcuddur.
Corat kənd Cümə məscidi 1937-1976-cı illərdə anbar kimi istifadə olunub. 2004-cü və 2018-ci illərdə məscid əsaslı şəkildə təmir edilmişdir.
Əvvəllər Coratda 4 məscid olub: Hacı Kiçikbəy qadınlar məscidi, Hacı Hümbət məscidi, Cümə məscidi, Gülxatın məscidi. Bu günümüzə gəlib çıxanlar isə Cümə və Gülxatın məscidləridir. Digərləri 1930-cu illərdə dağıdılıb.
Mənbələr:
