Dadaş İkram oğlu Dadaşov 3 fevral 1932-ci ildə Sumqayıtın Pirəkeşkül kəndində kolxozçu ailəsində anadan olub. Onun 9 yaşı olanda atası Böyük Vətən müharibəsinə yollanıb və orada həlak olub. 3 bacısı və anasını dolandırmaq yükü Dadaşovun çiyinlərinə düşüb.
Həmin vaxt Sumqayıtda tikinti işləri canlanmağa başlayır və Dadaş öz ailəsi ilə birgə Sumqayıt stansiyası yaxınlığındakı Tuqzavod deyilən yerdə məskunlaşır. Yaşı az olduğundan Dadaşı zavoda işləməyə götürmürlər və o, bir müddət Tuqzavod ərazisindəki yardımçı təsərrüfatda özü malabaxan, anası isə sağıcı işləyir.
1949-cu ildə Dadaş Səthi Aktiv Maddələr zavodunda təmizləyici işləməyə başlayır, daha sonra isə işgüzar və bacarıqlılığı ilə fəqlənən gənc aparatçı vəzifəsinə təyin edilir. O, 1972-1982-ci illərdə sahə ustası, 1982-1996-cı illərdə isə buxarlandırıcılar sexində briqadir vəzifələrində çalışıb.
Dadaş Dadaşov 2 dəfə (1966, 1971) Lenin ordeninə və Sosialist Əməyi Qəhrəmanı adına (1971) layiq görülüb. Həmçinin 1971-ci ildə o, şəhər Sovetinə deputat seçilib və "Qızıl ulduz" medalı ilə mükafatlandırılıb. Bundan əlavə, 1982-1996-cı illərdə Dadaşov “Lenin yubileyi” və “Əmək veteranı” medalları ilə təltif olunub, fəxri fərmanlar alıb və Heydər Əliyevin Fərmanı ilə Prezident təqaüdünə layiq görülüb.
1996-cı ildə, təqaüdə çıxdıqdan sonra Dadaşov Sumqayıt şəhər Veteranlar Şurasının üzvü olub və şəhərin ictimai-siyasi həyatında fəal iştirak edib.
Bu gün Dadaş Dadaşov cismən aramızda olmasa da, o, Sumqayıt sakinlərinin yaddaşında həmişə yaşayacaq və xatırlanacaq.
Ədəbiyyat:
