Bu gün Xalq artisti Rasim Ocaqovun anım günüdür. Onun vəfatından 19 il ötür.
Sumqayit24.az xəbər verir ki, rejissorun ilk sərbəst işi Sumqayıt metallurqlarının həyatından bəhs edən "Onun böyük ürəyi" filmi olub.
Qeyd edək ki, operator işi və sənətkarlıq cəhətdən maraqlı kinofilmlərin çəkilişində novator üsul və metodlardan bacarıqla istifadə edən Rasim Ocaqov mədəniyyətimizin incilərindən sayılan bir çox kino və televiziya filmlərinin ustalıqla yaradılmasına nail olub.
O, müxtəlif illərdə bir sıra dövlət mükafatlarına və fəxri adlara layiq görülüb, müstəqil Azərbaycanın ali mükafatlarından olan "Şöhrət" ordeni ilə təltif edilib.
Onu da əlavə edək ki, Rasim Ocaqovun böyük operatorluq və rejissorluq məharəti sənətkara ölkəmizin hüdudlarından kənarda da şöhrət gətirib. Onun yaratdığı kino və televiziya filmləri ayrı-ayrı kinofestivallarda mədəniyyətimizi yüksək səviyyədə təmsil edərək müxtəlif təltiflərə layiq görülüb, sənətşünaslar və tamaşaçılar tərəfindən daim böyük rəğbətlə qarşılanıb.
Xatırladaq ki, Rasim Ocaqov 2006-cı ilin bu günü, yəni iyulun 11-də Bakıda dünyasını dəyişib.
