1990-cı il yanvarın 19-dan 20-nə keçən gecə SSRİ baş katibi Mixail Qorbaçovun göstərişi ilə sovet ordusunun qoşunları Bakıya və Azərbaycanın digər rayonlarına yeridildi. Buna səbəb Dağlıq Qarabağ problemi və Azərbaycan xalqının azadlıq və müstəqillik uğrunda apardığı mübarizə idi.
Sovet ordusu dinc əhaliyə qarşı ağır texnikadan və müxtəlif silahlardan istifadə etmişdir. Bakı şəhərində fövqəladə vəziyyətin yanvarın 20-də saat 00-dan başlanmasına baxmayaraq, sovet ordusu yanvarın 19-da saat 21:00-da ilk olaraq Türkan-Qala tərəfdən Bakıya yeridildi. Hərbçilər yola çıxanları, yaşayış evlərini, avtomobilləri, təcili yardım maşınlarını atəşə tuturdular. Qanlı yanvarın günahkarlarından biri də bu soyqırıma rəhbərlik edən SSRİ müdafiə naziri marşal D.Yazov idi.
Yanvarın 21-də Heydər Əliyev, Azərbaycan SSR-in Moskvadakı Daimi Nümayəndəliyində çıxışı zamanı bu sözləri deyib: “Mən bunu (sovet ordusunun Azərbaycanda törətdiyi faciəni) qəti şəkildə pisləyirəm, ağır nəticələrə səbəb olan qeyri-insani, antidemokratik, qanunsuz hərəkət hesab edirəm” (rus dilindən tərcümə olunub).
Ümumi olaraq, Qanlı yanvar faciəsində 131 nəfər həlak olmuş, 744 nəfər yaralanmışdır. Ölənlərin 117-si azərbaycanlı, 6-sı rus, 3-ü yəhudi, 3-ü tatar idi. Bundan əlavə, 841 nəfər qanunsuz həbs edilmişdir.
Allah şəhidlərimizə rəhmət eləsin!
