Sumqayıtda yaşayan Qarabağ gəncləri “Birlik” Qarabağ həmrəylik düşərgəsində iştirak edə bilərlər. Bu barədə 8 sentyabr tarixində “Sumqayıt Gəncləri”nə istinadən xəbər veririk.
Düşərgə “Böyük Qayıdış” Gənclər Təşkilatı tərəfindən Gənclər Fondunun dəstəyi ilə 12-16 sentyabr tarixlərində Şamaxı rayonunda keçiriləcək.
Düşərgədə iştirak hüququna malik olmaq üçün COVID-19 əleyhinə vaksinasiya pasportu (minimum 2 doza olmaqla) və ya yararlı immunitet sertifikatı mütləqdir. Qeydiyyatdan keçən şəxslər növbəti mərhələyə uğurla keçəcəkləri halda müsahibəyə dəvət olunacaqlar. Burada gənclər yaşayış çadırlarında qalacaqlar. Seçimlər zamanı 18-25 yaş arası fəal və yaradıcı Qarabağ gənclərinə üstünlük veriləcək.
Qeydiyyatdan 9 sentyabr tarixinədək link vasitəsilə keçmək mümkündür. Əgər siz də şəbəkələşmək, Qarabağda dirçəlişlə bağlı ideyalarınızı bölüşmək, müxtəlif təlimlər, tematik təcrübə proqramları, panel müzakirələr, intellektual və komanda inkişafı oyunları vasitəsilə öyrənərək əylənmək istəyirsinizsə, müraciət edib düşərgədə iştirak şansını qazana bilərsiniz.
