Dahi Azərbaycan şairi İmaməddin Nəsiminin heykəli Sumqayıt şəhəri Səməd Vurğun küçəsində yerləşir.
Abidə 2003-cü ildə Nəsimi parkının baş xiyabanının girəcəyində qoyulmuşdur. Sonradan heykəl əvvəlki yerindən 60-70 metr məsafədə, öncəki yeri ilə üzbəüz postamentə yerləşdirilmişdir.
Nəsimi heykəlinin müəllifləri şəhərin baş rəssamı heykəltaraş Vaqif Nəzirov və rəssam Asim Quliyevdir. Onlar heykəli yaratmamışdan əvvəl şairin yaşadığı dövrü, həm də yaradıcılığını öyrənmişdilər. Sənətkarlar yaratdıqları 3 metrlik tunc heykəlin simasında dərin psixoloji xüsusiyyətləri təsvir ediblər. Heykəlin sol tərəfində, postamentin üzərində Nəsiminin edam səhnəsini əks etdirən barelyef qoyulub.
Abidənin yerləşdiyi mədəniyyət və istirahət parkı 1967-ci ildə yaradılıb. 1978-ci ildə parka İmaməddin Nəsiminin adı verilib. Hazırda parkın ümumi sahəsi 80 hektardan çoxdur.
İ.Nəsimi adına mədəniyyət və istirahət parkı 2001-ci ildə ölkə əhəmiyyətli tarix və mədəniyyət abidələri siyahısına daxil edilib.
[modula id="54943"]
