53 il əvvəl bu gün Sumqayıt Dövlət Dram Teatrının rəsmi açılışı baş tutmuşdur. Həmin gün teatr səhnəsində ilk tamaşa - Azərbaycan dramaturgiyasının və Azərbaycan ədəbiyyatında ədəbi tənqidin banisi Mirzə Fətəli Axundovun “Müsyo Jordan və Dərviş Məstəli şah” əsəri səhnələşdirilmişdir.
Tamaşanın quruluşçu rejissoru Cənnət Səlimova, rəssamı İsmayıl Axundov, bəstəkarı Emin Sabitoğlu idi. Mahnıların mətnini şair Zeynal Cabbarzadə yazmışdı. Tamaşada baş rolları Raid Əliyev, Hicran Hüseynov (Müsyö Jordan), Seymur Məmmədov, Hacı Xəlilov (Hatəmxan ağa), Almaz Ələsgərova (Şərəfnisə xanım), Nigar İbrahimova, Münəvvər Babayeva (Gülçöhrə) və başqa aktyorlar oynamışlar.
Sumqayıtda ilk professional teatr- Dövlət Gənclər Teatrı 1968-ci ildə AzSSR Nazirlər Kabinetinin qərarı və Mədəniyyət Nazirliyinin sərəncamı ilə yarandı. Teatrın kollektivi Mirzəağa Əliyev adına Azərbaycan Dövlət İncəsənət İnstitutunun aktyorluq fakültəsinin son kursunda təhsil alan tələbələrindən ibarət idi. 1969-cu ildə kollektivə görkəmli rejissor, peşəkar teatr sənətinin banilərindən biri olan Hüseyn Xələfovun (Ərəblinski) adı verildi.
1974-cü ildə Mədəniyyət Nazirliyinin qərarı ilə teatra “Sumqayıt Dövlət Dram Teatrı” statusu verildi. Hazırda Dram Teatrı Sumqayıt şəhərində, Azərbaycan küçəsi 21 ünvanında yerləşən binada fəaliyyət göstərir.
Mənbələr:
