Sumqayıt Dövlət Dram Teatrında maraqlı səhnə əsərləri təqdim ediləcək. Sumqayıt24 bu haqda 5 iyun tarixində xəbər verir.
İyun ayının 8-i və 12-də "Sevgilim Sumqayıt" əsəri oynanılacaq. Tamaşada Sumqayıtın 75 illiyi ərəfəsində insan taleləri kontekstində şəhərin tarixi əks ediləcək. Müəllif Əməkdar incəsənət xadimi Əli Əmirli, quruluşçu rejissor isə Xalq artisti, Prezident mükafatçısı, “Qızıl Dərviş” mükafatı laureatı Firudin Məhərrəmovdur. Tamaşada truppa üzvlərinin böyük heyəti çıxış edir.
Həmçinin "Mədəniyyət TV"-nin çəkiliş qrupu iyunun 22-də "Xəzinə" iki hissəli pritçasını təqdim edəcək. Tamaşanın müəllifi Hafiz Ataxanlı, quruluşçu rejissoru Xalq artisti Firudin Məhərrəmovdur. Mütəfəkkir şair Nizami Gəncəvinin konsepti əsasında işlənmiş pritçada onun "Xəmsə"sindən məşhur qəhrəmanlar səhnədə olacaqlar.
Əli Əmirlinin 44 günlük Vətən müharibəsinə həsr olunmuş "Xeyir xəbər" əsərinə Mədəniyyət Nazirliyinin tövsiyəsi ilə gənc istedadlı rejissor Fuad Cavadzadə quruluş verib. İyunun 25-də, Milli Ordu Günü ərəfəsində yeni tamaşanın premyerası keçiriləcək.
İyulun 2-də isə Mədəniyyət və İncəsənət Universitetinin diplomantı Jan Koktonun "İnsan səsi" tamaşasına daxili baxış nəzərdə tutulub.
Eyni zamanda mövsümün sonuna qədər iki əsərin premyerası planlaşdırılır. Mədəniyyət Nazirliyinin sifarişi ilə Georgi Xuqayevin "Varlı ev" faciəsi hazırlanır. Quruluşçusu teatrın baş rejissoru Firudin Məhərrəmovdur.
Digər tamaşanın, 44 günlük Vətən müharibəsinə həsr olunmuş "Kəşfiyyatçı"nın müəllifi və quruluşçu rejissoru isə Fuad Kazımovdur.
