Sumqayıt Dövlət Dram Teatrında yeni aksiyaya start verilib.
Mədəniyyət ocağından Sumqayit24.az-a verilən məlumata görə, “Ağ ölümə “yox” deyək!” layihəsi Regional Sosial Təşəbbüslərə Dəstək İctimai Birliyi ilə birgə təşkil olunub.
Teatrın müraciətində deyilir:
“Sumqayıt kimyaçıları, mühəndisləri, idmançıları, qələm adamları, yüksək bal toplayan abituriyentləri, fəal gəncləri ilə tanınır. Gəlin, bu şöhrəti qorumaq, şəhərin sağlam həyatını mühafizə etmək üçün birlikdə ağ ölümə "yox" deyək. Bundan sonra səhnəmizdə mütəmadi oynanılacaq Kamran Nəzirlinin "Narkoman" faciəsinə birlikdə baxaq və uçuruma yuvarlanan, mənəvi-fiziki cəhətdən heçliyə dönmüş bir gəncin taleyi fonunda narkomaniyanın dəhşətini izləyək.
Bilinməzə yeyin addımlarla yollanan yeniyetmə və gəncləri aydınlığa çıxartmaq, onlara işıqlı sabahın üfüqlərini göstərmək heç də gec deyil.
Hörmətli dostlar! Şəhərimizin mənəvi saflığını qorumaq, cəmiyyətimizə fayda vermək, gənc ailələri bu bəladan uzaq tutmaq naminə hər birinizi bu aksiyaya qoşulmağa səsləyirik.
Bu bəlaya yalnız fərqindəlik və sosial layihələrdə fəallıq göstərməklə qalib gələ bilərik.”
Qeyd edək ki, tamaşa 30 noyabr saat 17:00-da baş tutacaq. Biletlər teatrın kassasında satılır. Məlumat üçün əlaqə nomrəsi: (055) 449-42-12.
