“Stansiya Sumqayıt” yaşayış massivində tapılmış mağaralarda tədqiqat işləri davam edir. Sumqayıt24 bu barədə 29 oktyabr tarixində ApaTV-yə istinadən xəbər verir.
Tədqiqatçı Faiq Nəsibovun sözlərinə görə, ərazidə yaşayış məskənləri mövcud olub:
“Burada bir neçə mağara aşkar olunub. İlkin baxış keçirmişik, ilkin rəyimizi söyləyə bilərik. Mağaralar təxminən 19-cu, 20-ci əsrlərdə qurulmuşdur. Konkret olaraq bu mağarada ocaq yeri olub və burada 3-4 nəfər yaşayıb. Eyni cür 4-5 belə mağara var”.
O, əlavə edib ki, ətraflı rəy vermək üçün daha geniş tədqiqatlara ehtiyac var.
Mağaralar arxeoloqları da özünə cəlb edib. Tədqiqatla məşğul olan arxeoloq İdris Əliyevin iddiasına görə, buradan torpaq daşınıb:
“Çox güman ki, burada işləyən fəhlələr və ya alman əsirləri özləri üçün otaqlar düzəldiblər. Yaxud mühafizə sisteminə xidmət edən hərbçilər burada özləri üçün yer qurublar. Ərazidə olan karyer haradasa uzunluğu 200 metrdən çox sahəni əhatə edir. Torpaq buradan çıxıb və nəticədə çökəklik əmələ gəlib”.
Yekun rəy hələlik verilməyib.
