Sumqayıtda tarixi ovdan aşkarlanıb. Bu haqda 14 noyabr tarixində Sumqayıt24 xəbər verir.
Ovdanlar insanlar tərəfindən içməli suyun saxlanması, həm də təbii soyutma üçün istifadə olunub. Onların su mənbəyi yeraltı torpaq və yağış sularıdır. Belə tikililərdən biri “Yaşma bağları” ərazisində yerləşir. O, Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsinin əməkdaşları tərəfindən tapılıb.
İki hissədən ibarət ovdan yaşayış məntəqəsindən bir qədər aralıda, düzənlik ərazidə yerləşir. O, 10 pilləkəndən ibarətdir. Ətrafında çoxsaylı saxsı fraqmentlərinə rast gəlinir.
Dövlət Xidmətinin Şabran Regional İdarəsinin rəisi Sabit Qurbanovun Apa.az-a dediyinə görə, ovdanın orta əsrlərə aid olduğu ehtimal edilir: “Eyni ilə bu ovdandan Xızı rayonunun Şurabad qəsəbəsində də var. Lakin Yaşmada yerləşən ovdanın özəlliyi, onun üzərində Qobustan, Səngəçal, Hacıqəbul, Siyəzən və Şamaxı ərazilərində tapılan bəzi Türk tayfa damğaları həkk olunub. Bu ovdanın üzərində 24 Oğuz boyundan biri olan Salur tayfasının damğası var. Bununla yanaşı, ovdanın üzərində insan fiquruna oxşayan damğa da aşkarlanıb. Bu damğalar noğayların istifadə etdiyi tayfa damğasıdır. Ümumiyyətlə abidənin üzərində altıyadək damğa mövcuddur. Buradakı damğalar Şimali Qafqazda tapılan damğalarla 70%-ə yaxın uyğunluq təşkil edir”.
İdarə rəisi bildirib ki, bəzi işbaz “qızıl axtaranlar” tikilinin ətrafında qanunsuz qazıntı işləri aparıblar. Bunula bağlı hüquq-mühafizə orqanlarına müraciət olunub. Yaxın vaxtlarda arxeoloqların iştirakı ilə ərazidə geniş tədqiqat işlərinin aparılması nəzərdə tutulur.
AMEA Arxeologiya, Etnoqrafiya və Antropologiya İnstitutunun əməkdaşı Minayə Feyzullayevanın sözlərinə əsasən, ovdanın mövcudluğu yaxınlıqda yaşayış məntəqəsinin olmasından, vaxtilə karvansarayın mövcudluğundan xəbər verir: “Ovdanın ətrafından saxsı fraqmentlərin tapılması, qədim daşların mövcud olması ərazinin karvan yolu üzərində yerləşdiyini deməyə əsas verir. Böyük ehtimal ki, burada karvansaray yerləşib, karvansarayda gecələyənlər ovdandan istifadə ediblər”. [modula id="26811"]
