“Gənclik şəhəri” coğrafi mövqeyinə görə Xəzər dənizinin qərb sahilində yerləşir. Sumqayıt inzibati rayonu Abşeron yarımadasında 9495 hektar düzənlik sahəni əhatə edir.
Buranın iqlimi subtropik olduğu üçün yay ayları isti, qış mövsümü isə mülayim keçir. İlin 200-ə yaxın günü küləkli olur. Küləyin sürəti çox vaxt 5-20 m/s arasında dəyişir. Havanın ən aşağı temperaturu yanvar ayında (-13), ən isti isə avqust ayında (+40) qeydə alınıb. İllik orta temperatur isə +14,4 dərəcə təşkil edir. Qeyd edək ki, yayda torpağın səthi +60 dərəcəyədək qıza bilir.
Yağıntılar əsasən payız-qış mövsümlərində olur. Yaz və yay aylarında isə quraqlıq olur. Şəhər ərazisindən Sumqayıt çayı axır.
İnzibati rayonda təbii bitki örtüyü əsasən yarımsəhra xarakterli yovşan və bataqlıq otundan ibarətdir. Şəhərdən kənarda – tülkü (bulvar ərazisində də - red.), çaqqal, dovşan və canavarlara rast gəlmək olar.
Qeyd edək ki, hazırda gözəl şəhərimiz parklarla əhatə olunur. Əminliklə deyə bilərik ki, Sumqayıt ölkənin ən yaşıl şəhərlərindən birinə çevrilib.
