Sumqayıt şəhərinin salınmasında alman əsgərlərinin böyük əməyi olub.
İkinci Dünya Müharibəsi – bəşər tarixinin ən böyük müharibələrindən biridir. Məhz bu müharibədə nə qədər insan həyatını itirib, kimlərsə əsir düşərək tanımadıqları ölkələrə sürgün ediliblər. Elə sovet əsgərləri tərəfindən əsir götürülmüş alman əsgərləri də o zaman tanımadıqları Sumqayıt şəhərinə gətirilib.
Onlar 40-50-ci illərdə şəhərin salınmasına cəlb edilirlər. İnşaatçılar qəsəbəsində "finski" adlanan taxta evlərin tikilməsində, eləcə də 4, 5, 18 və 19-cu məhəllələrin salınmasında xüsusi iştirak ediblər. Bununla yanaşı, burada 1952-ci ildə inşa olunan Cəfər Cabbarlı adına Mədəniyyət evinin tikintisində də onların əməyi olub.
Gənclər şəhəri olan Sumqayıtın salınmasında iştirak edən bu əsirlər elə əsasını qoyduqları şəhərdə dəfn olunublar.
Yeni Kotec qəsəbəsində yerləşən alman əsirlərinin qəbiristanlığında 311 məzar var. Məzarlıqda dəfn olunan 311 əsirdən 269-u alman əsilli olub, qalanları avstriyalılar və macarlardır. Qəbiristanlıq ərazisində qara xaç şəklində bir xatirə abidəsi də yerləşir. Sonuncu əsir burada 1949-cu ildə dəfn olunmuşdur.
Mənbələr:
