Bu gün sumqayıtlı Vətən Müharibəsi Qəhrəmanı Adil İbrahimlinin doğum günüdür.
Sumqayit24.az xəbər verir ki, Azərbaycan Ordusunun Xüsusi Təyinatlı Qüvvələrinin baş leytenantı olan Adil Asəm oğlu İbrahimli 9 sentyabr 1992-ci ildə Sumqayıtda anadan olub.
2008–2011-ci illərdə Cəmşid Naxçıvanski adına Hərbi Liseydə, 2011–2015-ci illərdə isə Heydər Əliyev adına Azərbaycan Ali Hərbi Məktəbində (AAHM) təhsil alıb.
2015–2017-ci illərdə Azərbaycan Silahlı Qüvvələrinin "N" saylı hərbi hissəsində xidmət edib.
2017-ci ildən isə Xüsusi Təyinatlı Qüvvələrin sıralarında baş kəşfiyyatçı, qrup komandirinin müavini, qrup komandiri vəzifələrində xidmət edib.
Baş leytenant Adil İbrahimli 2020-ci ilin 27 sentyabrında başlanan Vətən müharibəsində Murovdağ döyüşlərində, həmçinin Cəbrayılın, Füzulinin, Hadrutun, Xocavəndin və Şuşanın azadlığı uğrunda gedən döyüşlərdə savaşıb və noyabrın 7-də Şuşanın azad edilməsi zamanı qəhrəmancasına şəhid olub.
Adil İbrahimli göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra “Vətən Müharibəsi Qəhrəmanı”, "Vətən uğrunda", “Kəlbəcərin azad olunmasına görə”, “Xocavəndin azad olunmasına görə”, “Şuşanın azad olunmasına görə” və “Cəbrayılın azad olunmasına görə” medalları ilə təltif edilib.
Şəhid Adil İbrahimlini qürurla yad edirik!
