Sumqayıtda Vətən müharibəsi qaziləri ilə görüş keçiriləcək. Bu barədə 12 oktyabr tarixində Heydər Əliyev Mərkəzinə istinadən xəbər veririk.
"Vətəni yaşadan igid oğullar” adlı tədbir 14 oktyabr saat 14:00-da Heydər Əliyev Mərkəzində təşkil olunacaq. Görüşdə qazilər: Elmin Həsənov, Həsən Yaqubov, Şərbət Mahmudov iştirak edəcəklər. Burada qazilərimizin həyat və döyüş yolları haqqında məlumatlar veriləcək, videoçarxlar nümayiş olunacaq. Qəhrəmanlar müharibə ilə bağlı xatirələrindən danışacaqlar. Bədii hissədə şairələr Xatirə Fərəcli, Fəridə Səxavət şeirlər söyləyəcəklər. Şəhid Rüfət Əhmədzadənin anası Ruhiyyə xanım çıxış edəcək. Eləcə də müğənnilərdən Əlipaşa Paşayev, Zaur Yusifli, Əli Əzizoğlu, Sevda Akkaya, “Veteranlar” xalq xoru vətənpərvərlik ruhunda mahnılar ifa edəcəklər.
