1992-ci ilin 25 fevral tarixindən 26 fevrala keçən gecə keçmiş SSRİ-nin 366-cı alayının köməyi ilə Ermənistan silahlı qüvvələri tərəfindən Azərbaycanın Xocalı şəhərində soyqırım törədilmişdir.
Bu faciə nəticəsində 613 nəfər öldürülmüş, 1275 nəfər əsir götürülmüşdür, şəhərin özü yerlə-yeksan edilmişdir. Qətlə yetirilənlərin 106-sı qadın, 63-ü uşaq və 70-i qoca idi. 150 nəfərin taleyi isə bu günə qədər məlum deyil. Faciə zamanı Xocalının 487 sakini əlil edilmiş, o cümlədən yetkinlik yaşına çatmamış 76 uşaq, 8 ailə tamamilə məhv edilmişdir.
Ermənistan hücumda 10 tank, 16 zirehli transportyor, 9 piyada döyüş maşını istifadə etmişdir. Faciənin baş verdiyi gecə şəhərdə təxminən 2500 nəfərə yaxın sakin qalmışdır. Hücum başladıqdan sonra onlar azərbaycanlıların məskunlaşdığı ən yaxın yerə çatmaq üçün şəhərdən çıxmağa cəhd etmişdilər. Lakin işğalçılar Ağdam şəhəri istiqamətində yola düşən mülki əhalini vəhşicəsinə qətlə yetirmişdir.
Ermənistan rəsmiləri münaqişə zamanı törətdikləri vəhşiliklərə görə məsuliyyəti inkar edirlər və faktarı saxtalaşdırmağa çalışırlar.
