“Sportinfo TV”də yayımlanan “Futbol manşet” verilişinin növbəti buraxılışında “Sumqayıt” klubundan bəhs edilib.
Jurnalist Elçin Cəfərovun təqdimatında yayımlanan budəfəki buraxılışda “Sumqayıt”da baş məşqçi postu ilə bağlı xəbərlər diqqət mərkəzində olub.
Son günlərdə belaruslu çalışdırıcı Aleksey Baqanın yenidən “gənclər şəhəri” təmsilçisində gündəmə gətirilməsinə münasibət bildirilib.
Elçin Cəfərov klub rəhbərliyinə çağırış edib:
“Vaqif Cavadov ən sancılı dönəmdə komandaya baş məşqçi təyin olunub. Əlindəki oyunçu profilləri keyfiyyətli olmasa da, ən azından meydandakı planı ilə nə etmək istədiyini nümayiş etdirir.
Baqanı da görmüşük. Ümumiyyətlə, klub rəhbərləri gecə yatarkən yuxuda nə görürlərsə, sonra belə absurd fikirlərlə gülünc vəziyyətə düşürlər.
Əgər Vaqif Cavadov indiki imkanlarla komandanı bu vəziyyətə gətiribsə, ondan ikiəlli yapışmaq lazımdır”.
