Boks üzrə Avropa birinciliyinin qalibi olan sumqayıtlı idmançı vətənə qayıdıb. O, öz uğurlu çıxışı haqda danışıb. Sumqayıt24 bu haqda Boks Federasiyasına istinadən xəbər verir.
3 illik fasilədən sonra Avropa birinciliyinin qızıl medalını Azərbaycana gətirən Kənan Babayev (48 kq) döyüşlərin çətin keçdiyini bildirib: “Avropa birinciliyində zəif boksçuların olmadığını bilirik. Ən çətin görüşüm gürcüstanlı Oruc Əhmədovla keçdi. Final isə rahat idi. Rəqibi əsasən fiziki cəhətdən üstələdim və güclü zərbələr hesabına qalib gəldim. Əsas odur ki, hər şey ürəyim istədiyi kimi alındı və çempion tituluna yiyələndim. Lakin bununla kifayətlənmək fikrində deyiləm. Növbəti hədəfim bizi bu il gözləyən dünya birinciliyində də eyni nailiyyəti təkrarlayıb və ikinci titulumu qazanmaqdır”.
