Sumqayıtlı boksçu qardaşlar beynəlxalq turnirdə fəxri kürsünün ən yüksək pilləsinə qalxıblar. Sumqayıt24 bu haqda 20 iyun tarixində Boks Federasiyasına istinadən xəbər verir.
Yarış Gürcüstanın Qori şəhərində, Avropa və dünya çempionu Georgi Kandelakinin şərəfinə təşkil olunub. Burada Azərbaycan, Gürcüstan, Qazaxıstan, Ukrayna və Ermənistanın 100-dək gənc boksçusu mübarizə aparıb.
Millimizin tərkibində çıxış edən Kənan Babayev (48 kq) finalda ermənistanlı Ovane Arutunyanı, qardaşı Kamil Babayev (54 kq) isə qazaxıstanlı Aslan Aslanovu tam üstünlüklə məğlub edərək qızıl medala layiq görülüblər.
Qeyd edək ki, turnirə Sumqayıtın ən tanınmış məşqçilərindən biri olan Elbrus Rzayevin rəhbərliyi altında yollanan yığmamız turniri 5 qızıl, 2 gümüş və 3 bürünc medalla başa vurub və komanda hesabında birinci yeri tutub.
