Azərbaycan futbolçularını Qırğızıstana aparan şəxs bir müddət “Sumqayıt” komandasında oynayıb.
Sportinfo.az-ın məlumatına görə, son günlər futbolçularımız bir qayda olaraq Qırğızıstana üz tuturlar. Belə ki, ilin əvvəlində İldar Alekperovla Ramin Əhmədov Asiya ölkəsinə yollanmışdılarsa, yay fasiləsində Mirabdulla Abbasov, Nazim Məmmədzadə, İlkin Muradov bu ölkə klublarına keçiblər.
Bir neçə gün öncə “Turan Tovuz”u tərk edən Orxan Əliyevin də “Abdış-Ata” ilə müqavilə bağlayacağı gözlənilir.
Sual doğuran məqam isə - niyə məhz Qırğızıstan?
Vaxtilə “Sumqayıt”ın şərəfini qorumuş Qvanzav Maqomedov yadınızdadır? Futbolçularımıza “qardaşlıq” edən adam məhz odur.
Qvanzav Maqomedov futbolçu karyerasını başa vurandan sonra məşqçiliyə başlayıb, daha sonra menecerlik etmək marağına düşüb.
Qırğızıstanla bağlı əlaqələrinə gəldikdə isə, 2020-ci ildə bu ölkənin “Altay” klubunda forma geyinib və nəticədə ölkə kubokunun qalibi adını qazanıb.
